Bazahir aam lehjay me
kaha tha main ne jab us se
"Badal lo raasta apna
juda raahain yahin kar lo
hamaray chahnay na chahnay se
kuch nahi hota
ye hi sach hai keh hum do mukhtalif
raston ke raahi hain
to phir keyun dil ki maaney hum
shuru me manta hoon main
azziyat dil ko pohanchay gi
magar phir waqt guzray ga
sabhi zakhmon ko bhar de ga"
Meray is aam se lehjay pe wo
ik pal ko chonka thee
meri aankhon me aankhain daal kar
hairat se poocha tha
"Ye sab jo kah rahy ho khud ko ye samjha bhi paao gy?"
Bohat hi jee karda kar ke
main us dam muskuraya tha
bohat khud pe jabar kar ke
main us se keh ye paya tha
"Meri tum fikr rehnay do
sambhal jaoon ga main khud hi
sabhi zakhmon ko sii loon ga
bhula kar sari batoon ko
akaila bhi main jee loon ga"
Bohat hee be yaqeen aakhon se
us ne mujh ko dekha aur
Bina ik lafz bolay wo gai or phir nahi ai
Aur ab tark-e-taalluq ko
agarche umar beeti hai
magar is dil pe us ki zaat ka
jo naqsh qaaim tha
kabhi dhundla nahi hota
mujhay mehsoos hota hai
keh jaisay meray kanoon me
wo apni bolti aankhon se
sargoshi si karti hai
"Wo Sab Jo Keh Rehy thy
Khud Ko Wo Samjha Bhi Paye Ho?"
Subscribe to:
Post Comments (Atom)
No comments:
Post a Comment